20 hæða hús flýgur framhjá !

  Þetta ferlíki er á stærð við hálfan fótboltavöll eða 20 hæða hús.  Það hefur verið nefnt 2012 DA og er svokallað NEA smástirni, sem útleggst á ensku sem near-earth asteroid til aðgreiningar frá smástirnum sem fara og eru á ferð fjær jörðu.  Þetta smástirni er u.þ.b. 45 metrar í þvermál og 130 þús. tonn á þyngd. Það var uppgötvað 23. febrúar 2012 nokkrum dögum eftir að það sveif framhjá jörðinni í 2,6 millj. km fjarlægð.

  Útreikningar sýna að 15. febrúar n.k. mun það svífa framhjá okkur í 34.100 km fjarlægð sem er minnsta fjarlægð sem vitað er um að svona stórt smástirni hafi komið nálægt jörðu.  Þess má geta að mörg gervitungl eru fjær jörðu en þetta og Tunglið sjálft er venjulega í um 400.000 km fjarlægð.  Svona stór smástirni eru á sífellu sveimi í grennd við jörðina og á svona atburður sér stað á nokkurra áratuga fresti, en slík smástirni skella afar sjaldan á jörðunni, áætlað er að það gerist einu sinni á hverjum 1000 árum.  Árekstur 50 metra smástirnis hefur ekki í för með sér neina útrýmingu, nema fyrir það svæði sem það lendir á (dæmi Barringer gígurinn í Arizona), en árið 1908 er talið að slíkt smástirni hafi sprungið yfir Síberíu (Tunguska) og eyðilagt hundruð ferkílómetra af skógi.

  Á myndinni hér að neðan sést leið smástirnisins langt innan við braut gervitungla (græni hringurinn) og óravegu fyrir innan braut Tunglsins (ysti hringurinn).

Smástirni fer framhjá jörðinni

Athugasemdir

[Sumarliði Einar Daðason, 6.2.2013 kl. 09:44]

Eina hættan sem talin er stafa af þessu smástirni er að það rekist á gervihnött og tæti hann í sundur. En þetta smástirni fer inn fyrir sporbraut ystu gervihnatta, samt töluvert utar sporbrautar alþjóðalegu geimstöðvarinnar þannig að hún er ekki talin í hættu.

[Sverrir (IP-tala skráð) 6.2.2013 kl. 11:02]

Gæti alveg eins bombað á jörðina með þeim afleiðingum að allir deyji á stundinni. Hlýtur að styttast í að eitthvert smástirnið geri það. Það þarf ekki að vera stórt þegar það nær yfirborði jarðar til að afgreiða lífið á jörðu.

[Karl Gauti Hjaltason, 6.2.2013 kl. 11:41]

Sumarliði:
  Ég held það séu verulega litlar líkur á því miðað við allar þessar óravíddir sem eru þarna, þetta er eins og bíl sem ekið væri yfir Sahara rækist á mús sem þar væri á ferð. 

[Sumarliði Einar Daðason, 6.2.2013 kl. 12:32]

Nákvæmlega, það eru mjög litlar líkur á því að það gerist. Sömuleiðis varðandi árekstur við jörðina eins og Sverrir nefnir hér að ofan. Líkurnar á því eru taldar engar.

Ef svo illa vildi til að loftsteinninn myndi rekast á jörðina þá myndi það ekki vera neinn heimsendir. Fyrir okkur á Íslandi gæti þetta kannski valdið einhverjum vindbreytingum til skamms tíma, en við erum vön öllum veðrum.

Til gamans má reikna út árekstur á þessum heimasíðum (þ.e. hver áhrifin yrðu á jörðina og jafnvel út frá þinni eigin staðsetningu):

• http://www.purdue.edu/IMPACTEARTH

• http://simulator.down2earth.eu/

[Karl Gauti Hjaltason, 6.2.2013 kl. 12:32]

Sverrir:
  Vísindamenn hafi reiknað út að ekki séu neinar líkur til þess að þetta smástirni rekist á jörðina og þótt það gerði það myndi afleiðingarnar ekki vera alvarlegar nema fyrir það svæði sem það lenti á (kannski 1-2 þús. ferkílómetra svæði).  Allt tal um að það styttist í að alvarlegur árekstur smástirnis við jörðina sé á næstu grösum er ábyrgðarlaust.  Tíminn er einfaldlega afstæður og þrátt fyrir líkindi á slíku þá telja vísindamenn að alvarlegur árekstur verði e.t.v. á 50-200 milljón ára fresti og lífið er nú einu sinni 2-3 milljarða ára gamalt hér á jörðu og hefu rlifað af árekstra í miklu magni.