Skákuppbygging í Eyjum

  Undanfarin ár hefur Taflfélag Vestmannaeyja unnið markvisst að því að byggja upp öflugt skáklíf í Vestmannaeyjum.  Í fullorðinsflokki var stefnan snemma sett á að berjast um efstu sæti á Íslandsmótinu og hefur það gengið eftir og síðustu þrjú ár hefur sveit félagsins verið í verðlaunasæti á þessu 3-400 manna móti.

  Fyrir nokkrum árum settust forráðamenn félagsins niður og settu sér markmið fyrir krakkahóp félagsins.  Markmiðið var að krakkar í TV skipuðu sér í hóp bestu skákkrakka á landinu.  Þessu markmiði yrði náð með nokkrum aðgerðum, í fyrsta lagi með reglulegri kennslu og mótahaldi, í öðru lagi með því að fjölga mjög í byrjendahópi félagsins, í þriðja lagi með því að skapa skemmtilegt andrúmsloft meðal krakkanna, í fjóra lagi með því að fara reglulega upp á land og tefla við þá bestu og í fimmta lagi með því að leyfa þeim krökkum sem lengst væru komin að tefla við fullorðna í meira mæli en þá hafði þekkst.

  Nú, nokkrum árum síðar er árangur að koma í ljós; Árið 2005 eignaðist TV sinn fyrsta Íslandsmeistara um langt árabil, í flokki undir 10 ára, Nú í janúar 2007 eignuðumst við svo aftur Íslandsmeistara í þessum sama flokki barna 10 ára og yngri auk þess sem við áttum líka þann sem lenti í 3 sæti og loks nú um síðustu helgi varð sveit frá Vestmannaeyjum Íslandsmeistari í flokki skólasveita 13 ára og yngri auk þess sem B-sveitin Eyjakrakka varð efst í flokki B-sveita, sem sýnir best breiddina.

  Í Taflfélagi Vestmannaeyja stunda nú um 40 krakkar skák og þar af eru um 15 sem tefla í framhaldsflokkum félagsins.  Æfingar eru 3-4 sinnum í viku fyrir þau sem lengst eru komin en 2 svar í viku fyrir byrjendur.

  Þessi árangur verður á sama tíma og mjög öflugt skákstarf er unnið í fjölmörgum félögum og skólum á höfuðborgarsvæðinu og má þar nefna Rimaskóla, Salaskóla og Laugarlækjarskóla sem framleiða skákkrakka á löngum færiböndum og halda úti gríðarlega miklu starfi á þessu sviði.

  Þá er ég komin að því sem er tilefni þessarar greinar, nefnilega að ræða hvert framhaldið er.  Að mínu mati er nú komin tími til að leita út fyrir Eyjarnar að kennurum fyrir þá bestu í félaginu.  Hvað aðstöðumun varðar þá geta þessir krakkar ekki mætt á hverju kvöldi niður í Skákskóla, sem staðsettur er í Reykjavík, þau geta heldur ekki mætt á öll þau mót sem eru á dagskrá á höfuðborgarsvæðinu.  Þennan aðstöðumun þarf að vinna upp svo krakkar í Eyjum geti átt sömu möguleika á framförum og þau sem stunda skák á höfuðborgarsvæðinu (þetta á að sjálfsögðu líka við um krakka sem skara fram úr víðar á landsbyggðinni).

  Á fundi í Skáksambandinu um daginn ræddi ég þetta mál í stjórninni.  Fullur vilji er til að leita leiða til að mæta þeirri brýnu þörf sem þarna er að skapast og þar verður Skákskóli Íslands einnig að koma að með fullum þunga.  Þá væntir Taflfélagið þess að bæjaryfirvöld í Vestmannaeyjum átti sig á þeim krossgötum sem félagið stendur á hvað varðar afreksstefnu í barnastarfinu hér.

  Í Vestmannaeyjum er búið að leggja traustan grunn að öflugu skáklífi og nú er að huga að framhaldinu.  Það er verk að vinna.

Athugasemdir

[Georg Eiður Arnarson, 5.4.2007 kl. 17:30]

Til hamingju með glæsilegan árangur.

[Þorvaldur (IP-tala skráð) 5.4.2007 kl. 20:00]

Það verður að styðja við bakið á þessum krökkum, þó þau búi svona langt úti á landi. Greinilega miklir afreksmenn í skák í Eyjum.

[Karl Gauti Hjaltason, 10.4.2007 kl. 20:52]

Georg.

Takk fyrir hamingjuóskirnar.

Þorvaldur.

Nákvæmlega málið.

[Unnar Rafn Ingvarsson, 15.4.2007 kl. 12:53]

Blessaður Karl Gauti Til hamingju með titilinn og ykkar glæsilega barna- og unglingastarf í Eyjum. Ég hefði reyndar mikinn áhuga á að sækja í ykkar viskubrunn um uppbyggingu svona starfs á landsbyggðinni. Við á Sauðárkróki ætlum að gera tilraun til slíkrar uppbyggingar frá og með næsta hausti, og því gott að leita til þeirra sem hafa byggt upp svo glæsilegt starf.

 með bestu kveðju

Unnar Ingvarsson

[Karl Gauti Hjaltason, 15.4.2007 kl. 16:02]

Sæll Unnar.  Bara sjálfsagt að gera það Unnar, mitt mail er [e-mail] Láttu heyra í þér.Karl Gauti.