Á leið á Norðurlandamót barnaskóla í skák.

  Þá nálgast ferð okkar á Norðurlandamót barnaskólasveita í skák sem fer fram á Álandseyjum.  Þessi þátttaka fylgir sigri sveitar Grunnskóla Vestmannaeyja á Íslandsmóti barnaskólasveita sem fram fór í vor.

  Þeir sem eru í sveitinni eru : Kristófer Gautason, Daði Steinn Jónsson, Ólafur Freyr Ólafsson og Valur Marvin Pálsson.

  Með í för verðum við Ólafur Týr sem fararstjórar og Björn Ívar Karlsson sem þjálfari strákanna.

  Við leggjum af stað í býtið á fimmtudeginum og fljúgum til Stokkhólms, þaðan tökum við risaferju til Álandseyja, en siglingin tekur eina 6 tíma.  Strax á föstudagsmorgninum hefst keppnin og mætum við sveit Danmerkur í fyrstu umferð og síðar þann dag keppum við aðra sveitina sem kemur frá Finnlandi.

  Í fyrra fórum við á þetta sama mót í Svíþjóð, nema þá var sveitin reyndar skipuð eldri strákum, en árangurinn þá var mjög góður, silfurverðlaun og munaði aðeins 1/2 vinningi á okkur og efstu sveitinni.

  Sú staðreynd að sveitir frá svona litlu byggðarlagi eins og Vestmannaeyjum geti átt svo stóra hópa af frábærum skákkrökkum ár eftir ár segir manni að ekkert sé ómögulegt í íþrótta- og afreksstarfi.  Nú erum við búnir að vinna íslandsmeistaratitla í bæði sveitakeppni og einstaklingskeppni barna tvö ár í röð.

  Ég ætla að reyna að skrifa hér á þessari bloggsíðu frá mótinu jafnóðum og segja frá ferð okkar og skákkeppninni eins og tilefni gefst til.  Helsti tilgangurinn er að foreldrar krakkanna og velunnarar okkar og félagsmenn í Eyjum geti fylgst með ferðinni.  Það sparar líka eitthvað símhringingarnar, sem ég annars þyrfti að svara í sífellu.  Ég lofa þó engum ítarlegum skákskýringum, fremur að ég segi meira frá því sem fyrir augu ber.

  Ekki get ég lokið svo við þennan inngang nema nefna þá sem hafa stutt mest við bakið á okkur og Taflfélaginu í heild, sem er auðvitað fólk og fyrirtæki í Eyjum, Vinnslustöðin, Ísfélagið, Sparisjóður Vestmannaeyja, Glófaxi, Frár og Vestmannaeyjabær lagði fram fjármagn til kaupa á farseðlum fyrir sveitina.

  Strákarnir sjálfir hafa verið að tína og selja söl og líka harðfisk til að fjármagna það sem upp á vantar og hafa fengið frábærar viðtökur.

  Fyrir allt þetta ber að þakka.