Trúverðugur.

  Horfði á Davíð í Kastljósinu og fannst hann trúverðugur.  Veit þó að ég á ekki marga skoðanabræður, en það skiptir þó litlu.

  Man vel eftir uppástungu hans um þjóðstjórn og spyr afhverju menn urðu vitlausir vegna þessarar tillögu Davíðs ?  Hefur ekki einmitt komið í ljós að þetta var kórrétt hjá honum.

  Hljóta ekki menn einnig að taka undir með honum að loforðið um að hverjum steini yrði velt við hefur ekki verið efnt svo nokkurt vit sé í !

  Og hvað með einkahlutafélögin og vildarlánin til þeirra ?  Hvar eru mál þeirra stödd og ég trúi bara ekki að riftunarfrestir verði látnir líða í karp um keisarans skegg.  Hefur enginn áhuga á neinu raunverulegu, bara að koma Davíð burt, það er það eina sem kemst að.

  Þá er ég sammála honum um að stjórnleysi og agaleysið sé algjört.  Hvað er þessi ríkisstjórn t.d. að gera ?  Jú, koma honum frá og svo hvað ?  Lækka skuldir um 20% - er ekki allt í lagi með þingmennina ?  Og er verið að telja kjark í allt það fólk sem er að missa allt sitt ?

  Ég hef sagt það áður að við hefðum betur átt að bregðast hart við  strax í upphafi eins og bretar gerðu með hryðjuverkalögunum, skella öllu í lás svo menn hlypu ekki út með góssið.  En við gerðum þveröfugt, réðum þessa sömu menn til að stjórna bönkunum áfram og réðum svo flokksgæðinga í allar skilanefndir á sjálftökulaunum.  Vitleysan tekur engan enda. 

  Í viðtalinu kom fram að víða hafa reynst brotalamir í kerfinu og það er alltaf að koma betur og betur í ljós að viðvörunarorð ýmissa fyrir hrun komust greinilega ekki að þar sem menn voru gjörsamlega hættir að heyra.

  Langstærsti vandinn var fólginn í þöggun fjölmiðla, sem gjörsamlega brugðust í aðdragandanum.  Ástæða þess hefur oft verið nefnd samþjöppun eignarhalds fjölmiðla, einmitt það sem fjölmiðlalögin áttu að koma í veg fyrir.

  Og hver og hverjir komu í veg fyrir að þau lög komust í gegn ?  Já, einmitt, og þeir sitja enn og eru enn að.

  Þetta er ekki gæfulegt fyrir þessa blessaða þjóð.

  Davíð tekur miðið.

Davíð í Kastljósviðtali

Var Kristinn að lesa síðuna mína ?

  Það er gott að einhverjir séu að lesa síðuna hjá manni, hér er bloggfærsla mín frá 15. janúar sl:

   Fannst það mjög einkennilegt síðasta sumar, þegar viðskiptaráðherra (sem taldi okkur eiga nóg af peningum), í kjölfar jarðskjálftanna, lækkaði sjálfsábyrgð úr 80 þúsundum í 20 þúsund, svo allir brotnir blómavasar urðu þá sjálfkrafa á ábyrgð þjóðarinnar.

  Er ekki rétt að menn fari að átta sig á því sem skiptir máli, þ.e. að aðstoða þá sem aðstoð þurfa, en hætta þessum leikaraskap með skattfé.  Auðvitað þarf að aðstoða þá sem missa það sem þeim er verðmætast, en ekki eitthvað sem engu skiptir.

  Og hvernig er staðan núna, 7 mánuðum síðar ?

  = Þjóðin hefur komist að því að engir peningar eru til og við getum varla sinnt þeim sjúku og öldruðu !

Ráðherrum ekki treystandi fyrir löggjafarvaldi

Einfaldasta hagfræði í heimi !

  Þetta er algjörlega ofvaxið skilningi venjulegs fólks.  Hvenær í ósköpunum ætlar þessi þjóð að vakna upp af draumsvefninum ?  Þetta hús er táknmynd gróðærisins og þess tíma þegar menn misstu algerlega áttir í hagstjórninni í okkar blessaða landi.

  Það er alltaf þannig að ef þú ert blankur og eygir enga von um aura í bráð, þá hættir þú byggingu bílskúrsins um sinn, á meðan það ástand varir.  Það má alltaf klára hann seinna.  Hver kannast ekki við eitthvað slíkt frá því fyrir góðæri ?

  Ég hélt að þetta væri einfaldasta hagfræði í heimi.  Og árið 2010 verður verra ef eitthvað er.  Á að spara meira í heilbrigðiskerfinu ?

  Hvar eru hinar hagsýnu húsmæður sem áttu að vera í vinstra liðinu ?

Minnisvarði þess tíma þegar ráðamenn töpuðu vitglórunni !

Vill ljúka smíði Tónlistarhúss

Sést utan úr geimnum !

  Það er svo merkilegt nú eftir bankahrunið, að vanhæfi margra stjórnmálamanna, þjóðarleiðtoga, bankafursta og vina þeirra er svo augljóst að það sést utan úr geimnum.

  Furðulegra er þó, að þetta virðist klíkunni, sem næst þeim stendur, algjörlega hulið og morgunljóst af framgöngu þessara einstaklinga, að þau trúa því í fyllstu einlægni að þau muni komast til hæstu metorða innan síns hóps.

  Það getur ekki verið neinu um að kenna nema því að þau standa í þéttum og stórum hópi jábræðra og -systra, sem hvísla í eyru þeirra að það sé bara allt í himnalagi.

  Þetta er vitaskuld bara sorglegt miðað við atburði síðustu vikna og er til vitnis um þá þöggun, sem viðvarandi var hér í aðdraganda hrunsins.

  Margir í framsóknarflokknum virðast alltént hafa áttað sig á því að gera  varð róttækar breytingar, enda lá þar reyndar líf flokksins við, hvorki meira né minna, en stóra spurningin er hvað gerist í hinum flokkunum, þá sérstaklega þeim stærstu.

  Þöggunin á vissulega við um Sjálfstæðisflokkinn og  þar virðist hún enn lifa gróskumiklu lífi.  Það er einkennilegt að enginn skyldi ljóstra upp við þetta fólk að hann/hún hafa sungið sitt síðasta í stjórnmálum, a.m.k. um sinn.

  Ég held það sé lífsnauðsynlegt fyrir Sjálfstæðisflokkinn að opna nú augun  og horfa rækilega í kringum sig og sjá að veröldin í íslenskum stjórnmálum er ekki sú sem hún var fyrir 6 mánuðum.

Þessir eru góðir félagar.

Atlaga felldi íslenska kerfið

Samgöngur versna bara.

  Reyndar falla umræður um samgöngur til Eyja næstum alltaf í grýttan jarðveg, því þær eru yfirleitt afgreiddar sem væl í Eyjamönnum, en ég get þó ekki orða bundist og hætti mér út á þennan hála ís hér og nú.

  Ef vera kynni að einhverjir eigi erfitt með að setja sig í spor fólksins hér, þá set ég þetta upp í nokkrar algengar spurningar og leitast við að svara þeim sjálfur.

1.  Hver er staðan í samgöngumálum til Vestmannaeyja einmitt núna ?

2.  Hvernig er ferðum skipsins háttað og er það ekki bara ágætt ?

3.  Er eitthvað vandamál að ferðast með skipinu ?

4.  En er ferðin ekki ódýr, er hún ekki svo mikið niðurgreidd ?

5.  Getið þið ekki bara tekið flug ?  Getið þið ekki valið um Reykjavík og Bakka ?

6.  Hvern djö ... eruð þið þá að búa þarna og ef þið endilega viljið hangsa þarna getið þið þá ekki bara verið heima hjá ykkur ?

 Herjólfur á siglingu.

1. Staðan í samgöngumálum til Eyja hefur sjaldan eða aldrei verið hörmulegri.  Sérstaða Eyjanna liggur í því að vegasamgöngur eru ekki til þessa næststærsta þéttbýliskjarna á landsbyggðinni (utan stór-höfuðborgarsvæðisins) (einungis Akureyri er stærri).

2.  Herjólfur siglir tvisvar á dag milli lands og Eyja, það er tæpa 3 tíma hvora leið. Að undanförnu hafa ferðir verið felldar niður hægri vinstri, þar sem skipið hefur verið að bila æ oftar, vélarnar (sem eru 2) eru að bila og stundum báðar í einu og skipið er jafnvel að stöðvast úti á rúmsjó.  Stundum eru ferðir felldar niður vegna veðurs og hefur það aukist verulega síðustu misseri.

  Núverandi skip kom hingað 1992 og hefur því siglt í 16 ár.  Síðasti Herjólfur þjónaði í 15 ár (1977-1992), en gekk þó varla nema helmingin af því sem þetta skip hefur verið látið ganga.  Í haust bilaði veltiuggi svo skipið veltur víst eins og korktappi og ekki fyrir sjóveika að ferðast með því.  Varahlutir eru (að sögn) væntanlegir eftir fleiri mánuði svo ekki er von á bót á þessu í bráð. (hvernig verður ferðamannabransinn í sumar ef ekki verður bætt úr fyrir þann tíma ?).

3.  Sjóveikir.  Það er ekki fyrir alla að ferðast sjóleiðis, þar sem hluti fólks þjáist af svokallaðri sjóveiki sem ku vera ansi hvimleiður lasleiki og svo erfið er þessi árátta að menn taka út fyrir að sigla með skipinu, ef sjór er hreinlega ekki all-sléttur.  Það er því alltaf spurt um sjólag áður en ferð er ákveðin.  Nú er þessi ferð til/og frá Eyjum sjóleiðina ennþá erfiðari, þar sem skipið veltur meir en áður og bilanahættan pirrar vitaskuld allt skynsamt fólk.  Þess vegna eru margir Eyjamenn ekki á ferðinni upp á land nema veðurútlit sé gott yfir ferðatímann.

  Ekki pláss fyrir þig.  Annað vandamál er að stundum (sérstaklega á föstu- og sunnudögum) er upppantað í skipið, ef ekki fyrir bifreiðar þá klefar fyrir þessa sem ekki eru sjóhraustir.  Svo fólk þarf að áætla ferðir með löngum fyrirvara, sem ekki er gott þar sem veðurspár ná ekki svo langt.  Svo það er ekki auðvelt verk að skipuleggja bæjarferðir.

  Þörfin.  Hér þarf líka að taka með í reikninginn að margir sjúklingar þurfa að leita læknis, tannlæknis eða eitthvað það erindi sem fólk þarf yfirleitt að rækja í höfuðstað landsins.  Svo ekki sé minnst á að margir krakkar eru í íþróttum og þurfa því að keppa við jafnaldra uppi á landi, a.m.k. ef þau vilja ná árangri eins og allir stefna að.  Síðan á fólk eins og gengur ættingja í bænum, e.t.v. aldraða foreldra sem það vill vitja endrum og eins og með svona samgöngum, sem ég er hér að reyna að lýsa, er þetta alls ekki svo einfalt mál að komast milli staða á landinu okkar.

4.  Kostnaður. Ef tekin er hin hefðbundna vísitölufjölskylda, 4ra manna fjölskylda þá kostar það hana 25 einingar eða ca. 10.000 krónur að fara eina bæjarferð með skipinu með afslætti (án bensíns), ef reiknað er með klefa og bíl báðar leiðir.  Þetta er þó nokkur upphæð.  Ef þú þarft að fara oftar er eins gott að þú hafir dágóð laun.

 Það er stundum sagt að Herjólfur sé þjóðvegur Vestmannaeyinga.  Það eru aðeins tveir þjóðvegir á Íslandi sem rukkað er inn á, Hvalfjarðargöng og Herjólfur.  Í sumar fór ég Hvalfjarðargöngin og ætli miðinn hafi ekki kostað mig 500 krónur, ef það var svo mikið.  Ef ég hefði orðið fúll vegna þessa kostnaðar gat ég bara ekið Hvalfjörðinn.

5.  Flug hingað er háð veðrum eins og annars staðar og ferðir falla oft niður.  Þetta búa þó allir landsmenn við og ekkert um það að segja.  Það er fyrst og fremst kostnaðurinn við flug sem veldur því að fólk vill fara sinna ferða á ódýrari hátt.  Þetta vita allir landsmenn, þú ekur frekar með fjölskylduna út á land, því hitt er miklu dýrarar.  Flug er lúxus.  Gallinn við Eyjarnar er að hingað liggur engin vegur.

Flug á Bakka hefur bjargað miklu hingað til, þó þú takir vissulega ekki bílinn með þér.  Nú er þó svo komið að hætt er við að fljúga upp á Bakka í vetur, en það á að sjá til með vorinu svo þetta er engin valkostur lengur.

6.  Þessi spurning kemur alltaf fyrir rest.

   Ég tel óþarft að benda á mikilvægi byggðarinnar hér fyrir þjóðina, það liggur í augum uppi og þeir sem eru í vafa geta kynnt sér mikilvægi sjávarútvegs annars staðar.

  Ég vil þó trúa því að allir landsmenn eigi að hafa kost á að leita sér þjónustu og njóta menningar í höfuðstaðnum og komast þangað á verði sem þeir hafa sæmileg ráð á miðað við búsetu sína.  Ferðatíðni og aðbúnaður ferðalanga á að vera þannig að allir geta við unað.

  - Þessu er því miður ekki lengur þannig varið hér í Eyjum.  Ég hef áhyggjur af því að þetta komi illa niður á samfélaginu hér í minnkandi lífsgæðum fólksins.

  - Og enginn virðist hafa áhyggjur af þessu alvarlega ástandi.  Frétti þó af því að Grétar Mar hefði verið að ræða þetta á Alþingi um daginn, en enginn sá ástæðu til að taka til máls, hvorki Vestmannaeyjaþingmennirnir eða aðrir þingmenn úr kjördæminu, sem koma þó hingað á atkvæðaveiðar endrum og eins.  Kannski vegna þess hver hóf máls á þessu, en skiptir það máli hver bendir á það sem betur má fara ?

  Spurt er hvort þetta séu góðar eða slæmar samgöngur ?

  SVAR : Nei, þetta eru engar samgöngur !

Ferð Herjólfs felld niður

Sitjum uppi með hann !

  Herjólfur hefur ítrekað verið að bila síðustu mánuðina og spurning hversu lengi hann dugir án róttækra endurbóta.

 

Herjólfur í veltu.

  Svo virðist sem við munum sitja uppi með blessað skipið enn um sinn, því nú er skollinn á kreppa vegna veisluhalda nokkurra bankapeyja sem tókst að leggja þjóðarskútuna á hliðina undir lófataki og húrrahrópum þeirra sem stjórna þessu landi.

  Herjólfur kom til þjónustu 1992, en þá hafði hinn fyrri siglt frá 1977 eða í 15 ár og þótti hafa dugað vel.  Nú er þessi búinn að ganga í 16 ár, en þá er ekki öll sagan sögð því hann er á ferðinni næstum 15 tíma á dag.  Notkunartími þessa skips er því miklu meiri en fyrra skips.

  En ég hef bent á það áður að nægjusemi Eyjamanna er einstök, en hvort hún er til eftirbreytni veit ég hreinlega ekki, því svo virðist sem það sé ekki leiðin til þess að fá réttláta úrlausn í samgöngumálum.  Það hafa Eyjamenn fengið sannarlega að reyna undanfarin ár.

Vél Herjólfs bilaði

Hungrað barn í sælgætisbúð.

  Dag eftir dag eru haldnir fjölmennir borgarafundir í Reykjavík og getur það ekki verið nema til góðs eins.  Athyglisvert verður að fylgjast með því hvað kemur út úr þessari ólgu.  Ef allt verður óbreytt væri það sorgleg niðurstaða fyrir íslenskt samfélag.

  Vonandi er þetta byrjunin á að hinni miklu spillingu sem gegnsýrt hefur íslenska kerfið um árabil verði úthýst.

  Fremstir í flokki fóru útrásarvíkingarnir svokölluðu sem margir voru kornungir nýútskrifaðir bankastrákar sem lærðu klíkuskapinn af vinum sínum úr hópi brautryðjenda hinnar nýju stéttar auðmanna.  Allir voru þeir studdir dágóðum fordæmum um framgöngu gamalla forvera sinna, sem margir hverjir námu fræðin í sjálfum Háskóla stjórnmálaskóla Íslands.  Gengu þessar nýju "hetjur" þó miklu harðar fram í að auðgast á hrottalega ófyrirleitinn og skjótan máta og hirtu ekki um neinar afleiðingar, tilgangurinn var að fylla eigin vasa, svona svipað og hungrað barn í sælgætisbúð.

  Öllum þessum mönnum fylgdi herskari fyrirmanna og stjórnmálamanna allt upp þá allra æðstu, sem skáluðu og húrruðu svo undir tók í fjöllunum.  Sumir þeirra jafnvel læddust til að krækja sér í mola sem skroppið hafði af allsnægtarborðinu.

  Engin þurfti að hafa áhyggjur af því að upp um klíkuna kæmist, því fjölmiðlarnir voru á launum hjá þeim líka.

  Reyndar er mjög furðulegt að við höfum skorað svo hátt í erlendum könnunum um litla spillingu.  Þær kannanir hafa líklega ekki mælt öfluga klíkuvæðingu íslensks viðskipta- og stjórnmálalífs eða frændsemistengsl sem viðgangast um allt kerfið.  Þessi birtingarmynd spillingar hefur ágerst undanfarin ár hér á landi og má sjá klúr dæmi þess að þeir sem eru í innsta hring hafa varla haft samskipti við aðra en klíkuna og eru hreinlega forviða ef önnur skoðun "en hin eina rétta" berst í þeirra eintóna eyru.

  Hver er árangur þessara funda ?  Fundarmenn voru a.m.k. ekki kallaður skríll.

„Þetta er þjóðin“

Hófdrykkjumenn ?

Tálsýn drykkjumannsins.

  Íslendingar eru eins og áfengissjúklingar sem þyrstir í útlenda peninga sem þeir fá ekki.  Skuldheimtumenn í útlöndum sjá þetta og setja okkur skilyrði sem við göngum að fyrir rest til að fá sopann okkar.

  Væri ekki betra að ganga alla leið og hætta að drekka og taka strax út kalda svitann og martraðirnar ?

  Nei, ég er ansi hræddur um að menn hafi valið léttu leiðina út úr þessu !  Það er betra að halda áfram að vera með í partíinu um stund og þykjast vera hófdrykkjumenn, almenningur borgar brúsann !

Hvað skuldum við mikla peninga ?

  Mörgum gengur illa að átta sig á því hversu illa er komið fyrir íslenskri þjóð.  Við tökum á okkur nýtt 600 milljarða lán.  Og líklega þurfum við meira en það.  Hvað er það mikið ?

  Svona til að minna á hve mikið það er þá er ekki langt síðan Síminn var seldur fyrir 67 milljarða.

  Hvaða tilfinning greip um sig ?

  = Það var ekki sú stofnun sem ekki átti að fá aukið fé, það var ekki það málefni sem ekki átti að fá nýja stofnun, það var ekki það Sund sem ekki átti að fá nýja braut, það var ekki sá fjörður sem ekki átti að fá brú og það var ekki það fjall sem ekki átti að bora undir.

  Svo miklir voru peningarnir.

  Nú erum við að skrifa undir 9 sinnum hærri upphæð sem við skuldum vegna útrásarsnillinga sem völsuðu um án eftirlits - Eftirlits þeirra sem áttu að hafa hag þjóðarinnar í heiðri.

Viltu greiða af nýju 8 milljón króna láni ?

  Er einhver enn í vafa um stöðu okkar ? 

  Þetta eru litlar 2 milljónir á mann eða 8 millj. á hverja venjulega fjölskyldu.

  Viltu greiða af nýju 8 millj. króna láni núna ?

  Og þetta er lán sem þú baðst ekki um og fékkst ekki afhent.

  Hvað gerir þú við þann sem skellir þessu á þig að þér forspurðum ?

  Endurráða manninn strax, er það ekki ?

Hver er greiðslubyrðin ?  Og hver eru skilyrðin ?  Nei, þú færð ekki að vita það strax því það er svo mikið trúnaðarmál !

  Og menn hneykslast á sögum um maðkað mjöl sem prangað var inn á bláfátækan landslýð í einokuninni fyrr á öldum.

  Og hverjir segjast vera að koma okkur út úr ógöngunum ?

  Ég segi eins og Ólafur Ragnar í Dagvaktinni : "Já, SÆLL"

Icesave-deilan leyst

Þjóðstjórn er skynsamleg

  Engin vafi er á því að staða Íslands á alþjóðavettvangi er grafalvarleg.  Við fáum hvergi nein lán, nema við beygjum okkur undir kröfur breta og fleiri þjóða vegna Icesave reikninganna.

  Miðað við fréttir er komin upp pattstaða sem við erum föst í.

  Það eru engin fordæmi fyrir þvílíku ástandi hér á landi á lýðveldistímanum.

  Líkur og útlit fyrir mikilli kreppu hér á landi aukast með degi hverjum.

  Órói eykst í þjóðfélaginu.

  Stjórnarandstöðunni vex ásmegin.  Engin víkur af þeim sem sátu við kjötkatlana á meðan á góðærinu stóð.

  Þó er alls ekki unnt að ganga til kosninga næstu vikur eða í vetur yfirleitt á meðan á orrahríðinni stendur.  Hvað er þá til ráða ?

  Ég tel að ráðamenn eigi að ræða við stjórnarandstöðuna og helstu sérfræðinga í viðskiptalífinu og annars staðar sem góða menn er að finna og mynda þjóðstjórn úr hæfustu mönnunum í sátt við fólkið í landinu.  Mikilvægt er þó að sem flestir þessarra manna og kvenna séu sem minnst tengd óráðsíðufólkinu sem leiddu okkur inn í þessa skelfingu.  Hlutverk þessarar stjórnar yrði að róa í gegnum stærstu öldurnar og efna svo til kosninga.

  Af hverju :  Það verður og er ekki auðvelt fyrir ráðamenn að stjórna skútunni sómasamlega ef ólgan vex í landinu eins og hún virðist ætla að gera.  Þeir hafa nóg með að ræða við erlenda lánadrottna, ríki og innistæðueigendur og einbeita sér að því að ná sem hagstæðustu samningum við þessa aðila þó þeir þurfi ekki einnig að berjast við innlenda andstæðinga.

  Nú er þörf á samstöðu en ekki sundrungu.

Staðan er grafalvarleg

Nýjir ræðarar.

  Ég fylgdist með fréttum í kvöld og sá svo Silfrið.

  Á ummælum flestra mátti heyra að íslenska kerfið sé komið að endalokum síns tíma.

  Þessi ætterniskapitalisti og vinavæðingarárátta hér hlýtur að fara undir fallöxina, nema við viljum endurtaka sukkið enn á ný.  Ég held reyndar að fáir vilji kjósi það eftir þetta allsherjarklúður.

  Engin vafi er á því að þetta er rétt.  Þeir sem hafa farið með stjórnina hér síðustu áratugina hafa yfirhöfuð haft eigin hag eða a.m.k. hag sinna nánustu eða vina að leiðarljósi en ekki þjóðarhag við verk sín.

  Hvernig getum við breytt þessu fyrirkomulagi ?

  Einhver sagði að allir væru svo tengdir að þetta væri ekki nokkur leið í okkar litla landi.

  Aðrir hafa sagt að þessir sömu væru svo hrikalega tengdir sínum hópi að þeir sæu ekki út fyrir hann og má það til sanns vegar færa.

  Ég tel að hér sé nóg af kröftugu og hæfileikaríku fólki sem gæti tekið þétt um árarnar ef klíkan yrði frá að hverfa.